البواجي

هل انت بحاجة لتغير البواجي؟

سيارة البريوس مزودة ببواجي تستخدم مادة الايريديوم وهي من الانواع التي تدوم طويلا جدا . بحسب جدول الصيانة الرسمي من الشركة فانت بحاجة لتغير البواجي بعد 190-240 الف كيلومتر (120-150 الف ميل) او كل 12 سنة ايهما اسبق.

 

لكن في الاردن البنزين مش ولا بد فممكن تضطر انك تغيرهم قبل اوانهم لانه بصير يتراكم على البوجية الاوساخ اللي في البنزين.

ماهى انواع البواجي المعتمدة ؟

هنالك نوعان :

• DENSO SK16R11
• NGK IFR5A11  او النوع البديل والاحدث IFR5T11

ماهو سعر البواجي في الاردن؟

سعر البواجي عند المركزية هو 50 دينار . واذا بتقدر تشتريهم من الانترنت بكون ارخصلك!

اركب البواجى المعتمدة ولا البواجي المتوافقة الاخرى؟

برأي انك تركب البواجي المعتمدة وتريح راسك لسنين لقدام، حتى لو اشتريتهم من الوكالة بخمسين :)

شراء بريوس في الاردن( الجزء الثاني - التاكد من نظافة السارة)

وجدت سيارة واريد الاتصال بصاحبها، عن ماذا اسأل؟

في حال الاتصال للسؤال عن سيارة يفضل ان تسأل التالي :

1. سنة الصنع والمسافة المقطوعة(اكم ماشية , وتاكد ميل ام كيلومتر) : العملية نسبة وتناسب كل ما قدم عمر السيارة كل ما زاد عداد السيارة . لكن يجب ان تعلم ان معدل مشي السيارة في السنة هو 20الف كيلومتر(12.5 الف ميل)  يعني اذا انت بدك تشتري سيارة موديل 2008  في سنة 2012  فعمر السيارة 4 سنين والمسافة المقطوعة يجب ان تكون بحدود 80 الف كم (50 الف ميل) . اذا كانت المسافة المقطوعة اكثر من المعدل فيجب ان يكون سعر السيارة اقل . وتذكر ان عمر السيارة الفعلي هو عمر المحرك اي المسافة اللي ماشيتها السيارة.  او بمعنى اخر سيارة موديل 2008 ماشية 100 الف كم = سيارة 2007 ماشية 100 الف كم.
2.  فحص السيارة : السيارة الفحص اغلى من السيارة المضروية , اذا حبيت تشتري سيارة مضروبة فاتاكد انه سعرها بيفرق منيح عن السيارة الفحص . واذا كانت مضروبة تجنب المضروب امامي لانه الله اعلم كيف اتصلحت.
3. اضافات السيارة: سيارة البريوس تعتبر كاملة الاضافات بالنسبة للسيارات الاخرى لكن لديها اضافات اضافية , فاسال عن التالي لانه كله بيفرق:
• نظام البصمة(smart key) : تشغيل السيارة والمفتاح بجيبتك
• نظام الصوت 9 سماعات(JBL)ام عادي
• بلوتوث 
• اضوية زينون مع كشافات
• كاميرة خلفية(2006 وطالع)
4. السعر : بعد فترة من البحث عن سيارة فان الاسثلة السابفة ستعطيك السعر الفعلي للسيارة فاذا صاحب السيارة طالب فيها غالي لا تغلب حالك وتكمل وتروح تشوفها. اما اذا كان السعر مناسب فتوكل على الله وحدد اقرب موعد عشان تشوفها وتذكر انه اذا السيارة فرصة رح تطير بسرعة! 

في حال وجدت سيارة بريوس مستخدمة وذهبت لمعاينتها , كيف التاكد من نظافتها؟

1. المعاينة بالنظر :بكل سهولة يمكنك تمييز نظافة السيارة من الداخل والخارج من خلال تفحصها بالنهار , تاكد من عدم وجود ضربات بالبودي او الزجاج , تاكد من نظافتها من الداخل كعدم وجود ضربات في التابلو او بطانة الابواب اومزع بالفرش. تاكد من وجود اغراض السيارة كالعجل السبير والعدة التي تكون معه .اذا وجدت السيارة مناسبة وقبلت بالعيوب التي فبها ، فانقل للخطوة التالية(تذكر ان اي عيب في السيارة سيبفى في وجهك دائما الى ان تصلحه , وبالتالى سيزيد من تكلفة اليارة عليك)
2. اخذ جولة بالسيارة : يجب ان لا تستحي من صاحب السيارة ، جرب السيارة على سرعات مختلفة , اعمل فبها التفاف ، ارجع للخلف , اطلع فوق مطب بهدوء واه بريوستمع لاي صوت واسأل عنه. جرب المكيف والدفاية والاضاءة والمساحات والراديو وتاكد انه كل شي شغال تمام وانه ما فيه اي ضوء من اضوية الانذار ضاوي في التابلو. يفضل في هاي الخطوة يكون معك صديق معاه بريوس لانه ادرى فيها . اذا كل شي تمام انتقل للخظة التالية.
3. التاكد من عداد السيارة: للاسف الناس هاي الايام بتغش كثير واكثر شي ممكن تنغش فيه بالسيارات هوعداد السيارة لكن ممكن تتاكد من عداد وحالة اي سيارة وارد كندا او امريكا من خلا مواقع معروفة مثل CARFAX او AUTOCHECK مقابل مبلغ بسيط، يمكنك فحص خمس سيارات مقابل 35 دينار تقريبا. اذا كل شي تمام انتقل للخطة التالية
4. عربن على السيارة عشان تحجزها وروح عالبيت وصلي استخارة وتوكل على الله وروح ثاني يوم افحص السيارة
5. افحص السيارة عند احد الفحيصة المعروفين كمبيوتر وبودي فقط . اذا كل شي تمام انتقل لاخر خطوة
6. توكل على الله واشتري السيارة.

وهيك بتكون عملت اللي عليك , وان شاء الله رح تكون شروة موفقة وصحتين وعافية

شراء بريوس في الاردن( الجزء الاول - الخيارات المتاحة)

بريوس من الوكالة؟

الكثير منا في الاردن لا يملك المال الكافي لشراء سيارة جديدة وخاصة ان سعرالبريوس في وكالة الاردن غالي جدا , فعلى سبيل المثال عندما كانت سيارات الهايبرد معفاة تماما من الضرائب كان سعر السيارة في الوكالة 25 الف دينار بينما كان سعر السيارة في الوكالات الامريكية 15 الف دينار(ما يقارب 22 الف دولار).ولذلك المعظم في الاردن لا يذهبون الى الوكالة و يقومون بالبحث عن سيارة مستعملة على قدالحال.

لكن اذا كان لديك المال وبدك تريح راسك ، فالوكالة هي خيار مناسب . ولكن نصيحتي انك تشوف كم سعر البريوس بالوكالة وبعدين تشوف هالمبلغ شو ممكن تشتري فيه من انواع السارات الاخرى. لانه بسعر البريوس ممكن تحصل سيارة اوروبية او كورية مرتبة!

بريوس مستعملة:

عملية البحث عن سيارة مستعملة في الاردن عملية مضنية وينطبق عليها المثل الدارج "اللي بتعب بلعب" يعني بدك تدور منيح وتصبر لحد ما تلاقي احسن سيارة بتقدر تحصلها بكمية المصاري اللي معك. لكن اذا تسرعت وقمت بشراء السيارة بدون الاخذ بالاسباب , فا الله يسترك من المشاكل اللي ممكن تصير معك في المستقبل وخاصة انك بتحكي عن سيارة هايبرد مش اي سيارة عادية.

 خيارات شراء سيارة مستعملة:

• السوق الحرة والمعارض: كل ما تحكي لواحد من اهلك او اصدقاءك انك بتدور على سيارة اول شي بيحكولك اياه انك تروح على الحرة او تلف على المعارض ، طبعا ليش ؟ لانه السيارة مش ماشية على شوارع الاردن ، كلام سليم لكن لازم تعرف انه السيارة رح تشتريها من تاجر والتاجر بده يربح منيح وكمان السيارة ممكن تكون واقفه الها فترة طويلة (ما يغرك الشكل، التاجر بيكون ملمعلك السيارة عشان تجذبك)فبدها صيانة وغالبا لازم تغيرلها الاربع عجال بعد ما تشتريها بفترة وجيزة .

• الصحف اليومية و الاسيوعية: انا برأيي هاي الطريقة هي افضل طريقة لشراء السيارات المستخدمة لانه معظم الناس العاديين بيعلنوا عن سياراتهم بالجرايد عشان يخلصوا منها بسرعة ، لكن لا يخلو الموضوع من التجار ، فا بدك تدير بالك. طبعا الميزة انك تشتري سيارة من شخص مش من تاجر انه السيارة بكون صاحبها بيستخدمها بشكل يومي فيكون عاملها الصيانة الدورية اللازمة ولو فيها اي مشاكل بكون حاول يصلحها. فا انت بتوخد سيارة جاهزة انك تسوقها من اول يوم وما بدها نفض فوري.لكن بدك تتاكد انه السيارة مش مهيونة.

•  سيارة في الشارع عليها اعلان: اعرف انه غالبا في اشي غلط بهيك سيارة ، لاته البريوس الكويسة بتطير بسرعة ، اعلان واحد بالوسيط كفيل انه يبيعلك السيارة اذا انها نظيفة وسعرها مناسب. فهيك سيارة يا غالية كتيير يا انها مضروبة او فيها مشاكل.
• المواقع الالكترونية: ٩٩% من الاعلانات بتكون من تجار الا ما ندر.

اذا حبيت تشتري بسرعة فالحرة او المعارض هي خيار مناسب . لان البحث عن سيارة بلدية مستخدمة ونظيفة وذات سعر مناسب يمكن ان تاخذ وقت طويل قد يصل الى 3 اشهر او اكثر وعملية البحث يجب ان تكون متواصلة وجدية لانه الفرص قليلة واذا راحت فرصة الله اعلم متى اللي بعدها.

بالنسبة للبحث في الصحف الاسبوعية يجب عمل ذلك يوم الجمعة صباحا(يعني قبل الصلاة)  واذا اتاخرت بكون شخص اخر شاف
 السيارات وحجز وعربن على السارة الكويسة , واذا فيه فرصة بتكون راحت عليك.

في حال وجدت سيارة مناسبة قم بدفع عربون وما تتردد لانك بعد فترة من البحث رح تعرف السيارة الفرصة من السيارة العادية.والفرصة اللي بتروح صعب ترجع :)

في الجزء الثاني سنتحدث عن كيفية التاكد من نظافة السيارة ...