نقصان الزيت!!

اذا رحت لاي واحد وحكيتلة انه السيارة بتنقص زيت فاول اشي بسألك :السيارة بتنقط؟ بتحكيلو لأ. برد عليك وبحكيلك:اذا سيارتك "مفرهلة" او بمعنى اخر ماتورها خربان وبده صيانة كبيرة . وانت بعدين بخف عقلك.

الان الموضوع نوعا ما صحيح في السيارات القديمة اللي ماتورها اكل عليه الدهر وشرب. ولكن لما سيارة بريوس تكون جديدة والمسافة القاطعيتها لساتها مش كبيرة الحالة بتكون غير.

انا بحب أطمئن كل واحد معاه بريوس بتنقص زيت واحكيلة انه البريوس في الوضع الطبيعي بتوكل زيت , والحكي هاد مش من دار ابوي ولكن من تويوتا نفسهم، والاسباب اللي بتذكرها تويوتا لنقصان الزيت هي:

• اثناء عمل المحرك يتبقى جزء بسيط من الزيت المستخدم على جدران السلندرات وهذا الزيت يتم حرقه بفعل الحرار, وايضا عند محاولة ايقاف السيارة او تخفيف السرعة يتولد ضغط سلبي عالي يعمل على امتصاص جزء من الزيت الى داخل حجرات الاحتراق ويتم حرقه.
• الزيت ايضا يتم استخدامه لتزييت الصبابات الخاصة بالهواء والخاصة بالاكزوست وهذه ايضا ممكن انها تسبب حرق للزيت.

وهي الاسباب بالانجليزي :

• Oil is used to lubricate pistons, piston rings and cylinders. A thin film of oil is left on the cylinder wall when a piston moves downwards in the cylinder.High negative pressure generated when the vehicle is decelerating sucks some of this oil into the combustion chamber. This oil as well as some part of the oil film left on the cylinder wall is burned by the high temperature combustion gases during the combustion process.
• Oil is also used to lubricate the stems of the intake valves. Some of this oil is sucked into the combustion chamber together with the intake air and is burned along with the fuel. High temperature exhaust gases also burn the oil used to lubricate the exhaust valve stems.

ولكن اهم شي لازم تعرفه انه استهلاك الزيت بيعتمد على نوع الزيت ولزوجته. وانتو زي ما بتعرفوا انه الزيت اللى بنستخدمه للبريوس لزوجته اخف من السيارات الاخرى فعشان هيك بكون سهل سحبه لحجرات الاحتراق بفعل الضغط السلبي وحرقه. وكمان الانواع الموجودة بالسوق الله اعلم شو مصدرها الاصلي .وايضا حرق الزيت بزيد مع الوقوف المتكرر(لما تكون علقان بأزمة سير وبتشد شوي وبتهدي مباشرة) والسرعات العالية.

الان تويوتا بتحكي انه الزيت ممكن انه يمتص الرطوبة او يختلط معاه جزء من الوقود فما تحس انه نقص ولكن بعد مشوار طويل(زي انك تروح على المطار او البحر الميت او العقبة) رح تتفاجأ انه الزيت نقص منيح بفعل تبخر الرطوبة والوقود من الزيت!

النتيجة:

البريوس يتحرق زيت حتى لو انك تاكدت انه الزيت ما بنقص لانه ممكن يكون الزيت ناقص لكن بفعل امتصاص الرطوبة والبنزين مش باين عليه.

النصيحة:

تويوتا بتنصح انك كل ما بتعبي بنزين انك تتاكد من كمية الزيت في السيارة.

كمية الزيت اللي لازم تستخدمها لما تغير الزيت؟

• مع تغيير الفلتر : 3.7 لتر
• بدون تغيير الفلتر : 3.4 لتر

تاكد لما تغير الزيت انو اللي بغيرلك زيت ما يعبيلك 4 لتر . لانه الزيت الزايد اخو الناقص. واعرف انه كمية الزيت بن علامة ال "LOW"  وعلامة "FULL" هي 1.5 لتر . فلما تتاكد من كمية الزيت بالسيارة كل ما بتعبي بنزين اذا لقيت انه الزيت ناقص زيده بالعقل :).

زيت المحرك

لما تيجي تغير الزيت بتلاقي انواع زيت وارقام مختلفة وكل ما تسأل اللي بتغير عنده شو النوع اللي تستخدمه بيجاوبك نفس الجواب انه فيه نوع بيمشيك اكثر وفي نوع بيمشيك اقل. في هاي المقالة رح نتعرف على زيت المحرك اللي ممكن تستخدمه للبريوس .

لزوجة الزيت(Viscosity):

 اكبد لما تيجي تغير الزيت بتلاقي علب زيت عليها ارقام مختلفة هاي الارقام بتدل على لزوجة الزيت على درجات حرارة مختلفة. الرقم الصغير هو لزوجة الزيت في درجات الحرارة المنخفضه. اما الرقم الكبير فهو لزوجة الزيت عند درجات الحرارة المرتفعة.وكل ما زاد الرقم كل ما كان الزيت اثقل.

رقم الزيت المذكور في كتيب السيارة يختلف من بلد الى بلد ولكن دائما يذكر انه زيت 5w-30 هو افضل زيت للسيارة لانه اوفر للبنزين ويعمل بشكل ممتاز على جميع درجات الحرارة .

ولكن هذا لا يمنع استخدام زيوت ذات لزوجة غير الموصى بها, انا لايوجد لدي كتيب الوكالة في الاردن لكن الوكالة تستخدم زيت 5w-40 ، وايضا وجدت ان كتيب البريوس في اسبانيا(درجات الحرارة مشابهة للاردن) يسمح باستخدام درجات لزوجة مختلفة:

وكمان يفضل يكون الزيت تقييمه API SL وطالع (SM, SN) ويكون مكتوب عليه Energy Conserving عشان توفير البنزين لكن مش بالضرورة.

النتيجة!

شو ما كانت لزوجة الزيت اللي تستخدمها ما رح تضر بماتور السيارة وكمان في الاردن مافي درجات حرارة عالية جدا ولا منخفضة جدا ، الجو معتدل صيف وشتى . فما تدق كثير على الموضوع.

 فالفكرة مش باللزوجة الفكرة انك تلاقي نوعيه معروفة ومضمونة.

فترات تغيير الزيت؟

الزيت مقسو م الى ثلاثة انواع رئيسية:

• تقليدي(conventional): هذا الزيت هو الزيت المعدني وهو اقدم انواع الزيوت المعروفة
• نصف تصنيعي(synthetic blend) : خليط بين الزيت التقليدي ومواد مصنعة لتقديم عناية افضل للمحرك
• تصنيعي بالكامل(synthetic): مصنع في المختبر ليقدم احسن عناية وافضل اداء للمحرك.

شو ما كان نوع الزيت المستخم فان فترة تغيير الزيت حسب جدول صيانة الشركة هو كل 5 الاف ميل او 8 الاف كيلو . لكن الزيت التصنيعي يقال انه ممكن يدوم اكثر فممكن انك تغيره كل 10 الاف كيلو او اكثر.

سعر الزيت في الوكالة:

الزيت المباع في الوكالة هو زيت ليكزس تصنيعي بالكامل ولزوجته 5w-40 وال API تبعه هي SM , وسعرة بالوكالة 26 دينار لعبوة 4 لتر وممكن تحصلة من خارج الوكالة ب 23 دينار وسعر الفلتر الاصلي 6 دنانير.

النصيحة:

بما انه فترات تغيير الزيت متباعدة ، يعني ممكن بالسنة تغير الزيت مرتين فقط فانا برأي انك تشتري الزيت الاصلي اللي الوكالة بتستخدمة مع الفلتر(حوالي 30 دينار المجموع) وتروح على اي كازية وتغيره عندها . يعني الزيت لماتور اللكزس فانت بتكون مدلع البريوس لما تستخدمه :) .

في المقالة التالية رح اتكلم عن نقصان الزيت وكمية الزيت اللي لازم تستخدمها لما تغيرالزيت ..

تحديث:
اصبح زيت 5w30 متوفر بالسوق بانواع كثيرة واسعار معتدلة , لذلك يفضل استخدام هذه اللزوجة دائما , لانها الموصى بها.
  
تحديث:  المعلومات في هذا المقال تخص بشكل رئيسي البريوس 2004-2009 , البريوس 2010 وطالع تتطلب لزوجة زيت 0w20

البريكات الامامية

طيب يا جماعة

اشي كويس انه بين كل فترة وفترة تخلي محل بناشر بفكلك العجال وتشوف شو وضع البريكات لكن اذا انت زيي وما بتحب حدى يلعب بسيارتك فخليك لحد ما تسمع صوت من البريكات يدلك انه البريكات قاربوا انهم ينتهوا(طبعا اذا البريكات الراكبة نوع محترم يعني زي الاصلية بحطوا ماده يتعطي صوت لما يقريب البريك يخلص).

طبعا البريوس من السيارات اللي سهل تسمع الصوت لما يبلش يطلع ، فاذا سمعت الصوت لما تدعس بريك مباشرة غير البريكات باسرع وقت ممكن ، لانك اذا صبرت عليهم ممكن يخلصوا ورح تصير تسمع صوت صفير في هاي الحالة بكونوا خربولك الدسكات وبصير بدك مش بس تغيير بريكات وكمان ديسكات.

طبعا البريوس عمر البريك فيها طويل شوي لانه نظام البريك فيها ما بيستخدم البريك على العجل الا حسب الحاجة وبحاول انه يولد كهرباء كل ما تحاول تهدي عالخفيف .

شو سعر البريكات للبريوس؟

البريكات من اهم الاشياء في السيارة عشان هيك ما بدك بريك يصير يحمى او يطلع صوت بعد فترة ، عشان هيك انا بنصح انك تركب بريكات اصلية.

شكل البريك زي الصورة في الاعلى مع اختلاف اللون .سعر البريك الاصلي في الوكالة 47 دينار ، ورقم البريك هو :

04465-0w080

هذا الرقم الرسمي للبريوس في الاردن , لكن مش بالضرورة يكون هو الوحيد اللي بيركب , الرقم للبريوس الوارد اميركا بيختلف عن هاد الرقم ومع هيك بيركب , اذا بتدور في محلات القطع اللي عندها قطع تويوتا اصلي ممكن تحصل البريك بسعر ارخص. انا وجدت محل عنده بريك تويوتا اصلي برقم مختلف بسعر 36 دينار وعلى ذمة صاحب المحل وموقع Fitinparts انه بيركب(الموقع بيطلع كل الارقام البديلة) .

عند مين اركب البريك؟

اذا بدك تريح راسك ممكن تغير البريك عند محل متخصص هايبرد وهو بيعرف شو يعمل. البريوس نظام البريك فيها ممكن يشتغل والسيارة طافية عشان هيك ما بدك انه يشتغل وانته بتركب بالبريك لانه بعدين ممكن يمشكلك ويخلى عملية التركيب معقدة.

اذا بدك تغيرهم عند ميكانيكي عادي لا زم تتخذ احتياطات عشان ما يشتغل نظام البريك وانت بتغير فيهم(Brake Service). وكمان اوعك تخلي الميكانيكي ينفسلك البريك لانه البريوس البريك ما بتنفس فبها الا عن طريق الكمبيوتر.